Cerpen: TRESNA LAN TIMPAL

  Nama : Ni Putu Nopiyantini

 Npm   : 222001

 Prodi Pendidikan Bahasa Bali                                     

                                                    TRESNA LAN TIMPAL

  Jam 06.00 sore mahasiswa STKIP Agama Hindu Amlapura ne makasami sampun budal saking kampus. Ring margi wenten I Made Bayu lan I Kadek Agus majalan sambilanga makedekan. “Gus, suba paek jani ulangan semester suba ke ada peningkatan malajah?” raos I Made Bayu. “Beh, ngewalek Bayu ne, suba tawang tiang males buka kene dija  taen nyemak buku di jumah” pasaut I Kadek Agus nguyonin I Made Bayu. “Hahahaha, tiang nak matakon gen Gus, tiang suba patuh sing taen malajah” raos I Made Bayu sambilanga kedek. “Beh, kaden tiang je Bayu malajah di jumah” raos I Kadek Agus. Kedek ngakak lantas ipun sareng dadua ring margi.

  Ring atenge perjalan ne I Made Bayu lan I Kadek Agus nepukin anak luh jegeg ring arep ipun ne. I Kadek Agus cengar-cengir nepukin paras anak luh punika. “Aduhh…jegeg gati” raos I Kadek Agus. Kedek lantas I Made Bayu “Khakakak, apane jegeg”. Masaut lantas I Kadek Agus “Kete jegegne buin sade putih orange apane ne jegeg”. “Duarrrr” saget Ni Kadek Ririn ngesiabang I Made Bayu lan I Kadek  Agus saking duri ipun ne sareng dadua, makesiab lantas I Made Bayu lan I Kadek Agus. “Aitss…Ririn jek ngae atman Gus e nagih makecos, kaden tiang sire” raos I Kadek Agus. Kedek lantas Ni Kadek Ririn “Hihihi…ampura Gus, boye je maksud tiang ngae atman Gus e makecos. Dados Gus cengar-cengir niki?”. “Ne nak tuah anak luh jegeg” pasaut I Made Bayu bawak. “Ohhh kenten. Ulangan semester mangkin suba paek, punapi yening iraga ngae kelompok malajah sareng tiang, Gus, Bayu, lan Luh Sari?” raos Ni Kadek Ririn. “Tiang setuju manten Rin, ide becik sajan nika. Nanging timpal tiange I Made Bayu niki punapi ye?” pasaut I Kadek Agus. “Tiang setuju manten, nanging dije nika pacing kalaksanayang Rin?” pitaken I Made Bayu. “Ring umah tiange punapi? Rahina redite, nanging sampunang kanti sandikala iraga ngawitin saking jam 03.00-04.00 punapi?” raos Ni Kadek Ririn. “Setuju…!!!” raos I Kadek Agus lan I Made Bayu barengan.

  Sesampun ne rahina redite jam 02.55 I Kadek Agus lan I Made Bayu majalan bareng jagi malajah bareng ring umah ne Ni Kadek Ririn. Sesampune neked irika sampun wenten Luh Sari. “Suba makelo antos tiang, dados wawu teka Gus?” pitaken Ni Kadek Ririn. “Nak tiang makelo ngantos I Made Bayu mapayas Rin” pasaut I Kadek Agus sambilanga kedek. “De to gugune Rin, nak tunian tiang kari ngatehang meme tiang e mablanja” pasaut I Made Bayu. “Ohh kenten inggih ten punapi, ngiring jani kawitin malajah e apang nenten makutang waktune” raos Ni Kadek Ririn.

  Sesampun ne jam 04.00 I Kadek Agus, I Made Bayu, lan Luh Sari mapamit saking umah ne Ni Kadek Ririn. Sujatine I Kadek Agus demen sareng Ni Kadek Ririn, nanging Ni Kadek Ririn demen sareng I Made Bayu. Nika ngranayang I Kadek Agus dados semangat malajah bareng Ni Kadek Ririn.

  Buin mani ne Ni Kadek Ririn berangkat ka kampus, di jalan saget ban motor ne kempes, kanti Ni Kadek Ririn terpaksa majalan nandan motor ne kanti maan bengkel. “Mihh sial gati ban kempes, bengkel joh. Haduhh terlambat be ne ka kampus” raos Ni Kadek Ririn sambil nandan motor ne. Tusing joh Ni Kadek Ririn majalan saget ada I Made Bayu. “Rin, punapi nika adi dandan montor e?” pitakon I Made Bayu. “Niki Yu ban montor tiang e kempes” pasaut Ni Kadek Ririn. “Ohh kempes, amun dandan nika kanti ka bengkel kal terlambat dadine Rin. Meriki bareng tiang, motor e jang malu deriki kunci manten stang montor e” raos I Made Bayu. “Ahh ten Yu, bangeang pun tiang dorong manten kanti ka bengkel” pasaut Ni Kadek Ririn. “Behh jeg punang lek ajak tiang. Jang deriki manten motor e ten kar ilang. Benjep mulih ne tiang malih ngatehang meriki, tulungin tiang pun malih jebos ngalih bengkel. Mangkin enggalin malu menek pang ten enggalan terlambat” raos I Made Bayu. Masaut Ni Kadek Ririn sambil makenyem “Nggih Yu, ampura tiang ngerepotin”. “Behh santai manten sareng tiang” pasaut I Made Bayu. Jantung I Made Bayu dagdigdug serrr gelute bangkiang ne teken Ni Kadek Ririn, nanging I Made Bayu berusaha ngelawan atin ne pang ten kanti demen sareng Ni Kadek Ririn, krana timpal reket ne I Kadek Agus demen sajan teken Ni Kadek Ririn. Di perjalanan I Made Bayu lan Ni Kadek Ririn tusing ada ngorta apa-apa. Akhirne I Made Bayu lan Ni Kadek Ririn neked ring kampus. Uling joh I Made Bayu suba nepukin I Kadek Agus nyebeng nepukin I Made Bayu ngandeng Ni Kadek Ririn. “Yu makasi nggih, tiang dumunan masuk” raos Ni Kadek Ririn. “Ohh nggih mewali Rin” pasaut I Made Bayu. I Made Bayu langsung enggal-enggal maekin I Kadek Agus ane suba nyebeng krana nepukin I Made Bayu ngandeng Ni Kadek Ririn. “Gus de malu salah paham nahh” raos I Made Bayu. “Ahh ngakune sing demen, ehh jeg suba ngandeng gen” raos I Kadek Agus. “Gus tiang nak ten ada maksud keto, dingehang malu penjelasan tiang” pasaut I Made Bayu. “Aduhh ngudiang biin tiang misi ningehang penjelasan penghianat. Mare dibi chat jani suba sap” raos I Kadek Agus. “Gus dingehang nae malu de ngambres-ngambres keto misi ngoraang penghianat. Tiang nak tuni berangkat pas di jalan nepuk Ni Kadek Ririn nandan motorne krana ban ne kempes, terus ajakin tiang bareng apang tusing terlambat. Gus de nae pedih keto ajak tiang, tiang ten ada keneh nyerobot” raos I Made Bayu. “Seken to krana ban motorne Ni Kadek Ririn kempes? Awas nguluk-nguluk jeg pegat raga matimpal” pasaut I Kadek Agus. “Seken Gus. Amun ten percaya binjep mulih ne Gus ngandeng Ni Kadek Ririn ngalih motorne” raos I Made Bayu. “Gihh tiang percaya ajak Bayu. Amun kenten jani masuk malu pang ten enggalan dosen ne masuk” raos I Kadek Agus. I Made Bayu makenyem sambilanga anggut-anggut.

  I Made Bayu sareng I Kadek Agus majalan bareng masuk ka kelas. Neked di kelas I Made Bayu nepukin Ni Kadek Ririn suba negak di samping tegakan I Made Bayu. Ni Kadek Ririn makenyem nyingakin I Made Bayu. Jantung I Made Bayu tusing bisa naenan biin. Tapi I Made Bayu harus ngengkebin makejang perasaan ne apang I Kadek Agus lan Ni Kadek Ririn tusing nawang. “Yehh adi makelo neked di kelas Yu?” pitaken Ni Kadek Ririn. “Ngih Rin tiang wawu ngorta dumun sareng I Kadek Agus. Ohh gih malih jebos mulih ne sareng I Kadek Agus ngih, tiang ten mrasidayang ngatehang wawu san tiang telpun ne sareng meme oraine nyemput adin tiange les” raos I Made Bayu. “Ohh ngih Yu, ampura tunian tiang ngerepotin Bayu” pasaut Ni Kadek Ririn. “Tiang ten marasa di repotkan kok Rin” pasaut I Made Bayu sambil makenyem.

  Galah sampun jam 06.00 sore jam pelajaran sampun puput, mahasiswa ne sampun dados budal. I Kadek Agus maekin Ni Kadek Ririn sane kari negak nyelepang buku ne ka tengah tas ne. “Rin…payu jak Gus mulih ngalih motore?” raos I Kadek Aguse. “Payu Gus. Yuk berangkat mangkin” pasaut Ni Kadek Ririn.

  Bawak satua, I Kadek Agus suba neked jumah ne. I Kadek Agus langsung ngechat Ni Kadek Ririn. “Hay Rin, pun neked di jumah?” pitaken I Kadek Agus ring chat whattsapp. “Hay Gus, sampun kok suksma gih” pasaut Ni Kadek Ririn. “Ohh ya Gus, jagi mataken kira-kira Bayu napi gih ne paling demenina?” pitaken Ni Kadek Ririn. “Ahhh?? Kenapi nakenang kenten?” pitaken I Kadek Agus. “Ten kenapi kok Gus, tiang cuma lakar ngemaang sesuatu jak Bayu krana sampun nolongin tiang” raos Ni Kadek Ririn. “Oh kenten.. Men  untuk Gus ten? wkwkwk” raos I Kadek Agus ring chat ne. Ni Kadek Ririn males chat ne I Kadek Agus nganggen emoticon kedek manten. Sebenah ne Ni Kadek Ririn lakar ngemaang hadiah ka I Made Bayu krana demen.  

  Ring rahina redite Ni Kadek Ririn ngechat I Made Bayu ngajakin ketemuan ring lapangan Chandra bhuana lakar ngemaang hadiah sane sampun kasiapang, sambilanga lakar ngorahang demen teken I Made Bayu. Disampune neked ring lapangan, “Punapi Rin? Ngajakin tiang matemuan?” pitaken I Made Bayu. “Niki Yu, tiang lakar ngemaang niki krana Bayu sampun nolongin tiang” raos Ni Kadek Ririn sambilanga ngemaang hadiah sane sampun siapange. “Sareng tiang lakar ngorahang sesuatu Yu” raos Ni Kadek Ririn malih. “Behh Ririn jeg repot manten, lakar ngorahang napi nika Rin?” raos I Made Bayu. Uling joh saget wenten I Kadek Agus, I Kadek Agus lantas maekin I Made Bayu sareng Ni Kadek Ririn. “Ye Bayu sareng Ririn ngujangin deriki jak dua?” pitaken I Kadek Agus. “Yee.. Gus” raos I Made Bayu makesyab ningalin saget wenten I Kadek Agus. “Niki Gus, Ririn ngajakin tiang matemu, sareng ngemaang niki” pasaut I Made Bayu sambil ngedengang sane baange teken Ni Kadek Ririn. “Eehh Gus” raos Ni Kadek Ririn sambilanga makenyem. “Ohh sajan Ririn lakar ngorahang napi sareng tiang? Ten punapi kan wenten I Kadek Agus deriki?” raos I Made Bayu. “Kene Yu, sebenah ne tiang selama niki demen teken Bayu” raos Ni Kadek Ririn. I Kadek Agus lan I Made Bayu makesyab ningeh raos Ni Kadek Ririn. “Ampura Rin, tiang nak ten demen sareng Ririn” pasaut I Made Bayu ragu-ragu. Ni Kadek makesyab ningehang raos I Made Bayu. “Rin, sebenah ne Gus demen sareng Ririn. Tapi mangkin ternyata rasa demen Gus bertepuk sebelah tangan. Malah orang ne demenin Gus demen ajak timpal Gus e” raos I Kadek Agus nyebeng. I Made Bayu marasa pelih. Sujati ne keneh I Made Bayu demen teken Ni Kadek Ririn, nanging ada timpal I Made Bayu, I Kadek Agus sane demen teken Ni Kadek Ririn. “Ampura niki Gus, Gus pun nawang kenken perasaan tiang e mangkin” raos Ni Kadek Ririn. I Made Bayu nagih malaib ngejohin Ni Kadek Ririn lan I Kadek Agus. “Yu…kal kija?” pitaken I Kadek Agus. “Tiang lakar mulih” pasaut I Made Bayu. “Adi Bayu menggal-menggalan nagih mulih? Jujur teken Gus, Bayu demen masih teken Ririn?” pitaken I Kadek Agus sambilanga ngisi liman ne I Made Bayu. “Gih Yu, oraang mangkin apang jelas makejang. Tiang nak seken demen sareng Bayu, tiang ten ada perasaan sareng Kadek Agus. Bagi tiang tresna ten bisa ka paksa” raos Ni Kadek Ririn. “Tiang ten nawang engken perasaan tiang ka Ririn. Tapi tiang lebih baik nahan semua rasa niki di bandingin tiang harus putus matimpal teken I Kadek Agus” raos I Made Bayu. “Yu, jujur jak Gus. Amun demen tiang ten kar pedih. Tiang nerima yening seandai ne Bayu demen teken Ririn. Gus ten bisa maksain tresna. Gus bangga teken Bayu nyak mentingin timpal di bandingin perasaan. Jani Gus matakon buin cepok nanging Bayu harus jujur. Bayu demen teken Ririn?” raos I Kadek Agus sambilanga ngelut I Made Bayu. “Suksma Gus, jujur tiang sebenah ne demen teken Ririn. Sekad tiang nolongin Ririn dugas niki” pasaut I Made Bayu. “Nahh mangkin sampun jelas Bayu sareng Ririn saling tresna. Gus ten nyak makejang dadi ne sakit ati. Mungkin jodoh Gus e tusing ja Ririn. Mangkin Bayu harus ngorahang perasaan Bayu ne ka Ririn” raos I Kadek Agus sambilanga makenyem. “Sebelum ne suksma niki Gus. Gus sampun iklas ajak semua niki” raos Ni Kadek Ririn sambilanga makenyem. “Gih Rin. Tiang bagia ningalin timpal tiang e bagia. Lamun kenten Rin, Yu tiang lakar mulih dumunan” raos I Kadek Agus makenyem. “Suksma Gus” raos I Made Bayu, I Kadek Agus sane sampun majalan makipekan sambilanga makenyem. I Kadek Agus dengan berat hati ngalain I Made Bayu sareng Ni Kadek Ririn sane kari ring lapangan ajaka dadua, derika ajaka dadua saling ngungkapin rasa tresna ne.